Путь Героя

Азамат Сманов 1924 жылы Сарыағаш ауданы, Жартытөбе ауылдық округі, Ынтымақ (бұрынғы Бірінші май) ауылында дүниеге келген. 1942 жылдың күзінде Сарыағаш аудандық әскери комиссариаттың шақыртуымен әскер сапына алынған. Қысқа мерзімдік әскери оқу-жаттығулардан өтіп, мергендер тобымен майданға аттанады. Дондағы Ростов түбіндегі қантөгіс шайқасқа қатысып, жеңіске деген үміт ұшқынын ұятуға үлесін қосты. Украина, Кавказ майдандарындағы кескілескен соғыста да өзінің асқан мергендігін көрсете білді. Туған жер мен Отанның отын сөндірмеуді өздеріне серт еткен әрбір Отан қорғаушының басты арманы еді. Сондай арманды ақиқатқа айналдырған ардагерлеріміз, асқан ерлікпен соғысып, бізге бүгінгі бейбіт күнді сыйлады. Біздің де атамыз Азамат Смановта осындай арманмен айқасқа түсіп, Бірнеше жауангерлік наградалармен марапатталады. Қызыл Армия қатарынан 1949 жылы ауылына оралады. Соғыстан кейін, Қабланбек малдәрігерлік техникумын аяқтаған. Сосын Сарыағаш, Келес аудандарының шаруашылықтарында мал дәрігері, есепші тәрізді жұмыстарды мінсіз атқарып, отыз жылдық еңбек стажымен зейнетке шықты. Жұбайы екеуі 6 ұл тәрбиелеп, жиырмаға жуық немере сүйді. 2006 жылы қайтыс болды. Аңыз болған ардагер атамыздың атына өзінің туған ауылынан көше берілді.