Путь Героя

Балхашев Тасжан Балхашұлы (1925-2009) – Ұлы Отан соғысына қатысушы. 1925 жылы 23 ақпанда Батыс Қазақстан облысы Орда ауданының Талап ауылында шаруа отбасында дүниеге келді. 1940 жылы Талап орта мектебін бітіріп, кейін осы ауылдық кеңеске қарасты «Көсем» колхозында еңбек жолын бастады. Өмір бойы білім алудан жалықпаған Т.Балхашев Орал ауылшаруашылығы техникумын, Мәскеудің жоғарғы партия мектебін, Алматы халық шаруашылығы институтын бітіріп, зоотехник және инженер-экономист мамандықтарын алып шықты. 1942 жылдың желтоқсан айынан 1950 жылдың сәуір айына дейін яғни 7 жыл 4 ай Кеңестер Армиясы қатарында болып, Ұлы Отан соғысында І Балтық, Калинин және ІІІ Белорус майдандарында соғысқа қатысты. Жас жауынгер Т.Балхашев 58, 72, 154-дивизиялар құрамында қатардағы жауынгер, атқыш ретінде соғысып, Духовщина, Городок, Витебск, Полоци, Шяуляй, Бартанштели және тағы басқа қалаларды фашистерден азат ету шайқастарына қатысты. Соғыста барлаушы болып үш рет жараланып, бір рет ауыр контузия алған. Жауынгер Т.Балхашев соғыс аяқталған соң елге оралып Талап ауылдық кеңесінде қызмет етіп, №11 Әліпқали сайлау округі бойынша атқару комитетінің депутаты болды. Ол 1950-1960 жылдары ауылдық кеңестің хатшысы, төрағасы, бастауыш партия ұйымының хатшысы болып қызмет атқарды.1960-1979 жылдары бұрынғы Чапаев, қазіргі Ақжайық ауданының «Родник новый» колхозы басқармасының төрағасы, 1979-1990 жылдары төрағаның орынбасары болып жұмыс жасады. Ұлы Отан соғысының ардагері Т.Балхашевтың өмірі Ақжайық ауданындағы «Родник Новый» ұжымшарының өндірісімен тығыз байланыста өрілді. Осы жылдары ауылдағы мал мен егін шаруашылықтары қатар өсіп- өркендеп, ұжымшар мүшелерінің тұрмыстық жағдайлары, әл-ауқаты артты. Еңбек ардагерінің бастамасымен мал азығының берік қорын жасақтау мақсатында жүйелі көлтабандар мен тұрақты суармалы жерлер игерілді.Көптеген құрылыстар салынып, мәдени ағарту, денсаулық сақтау, сауда орындары жаңа ғимараттарға көшті. Бұл жылдары мал орындары жүйелендіріліп, механикаландырылған қырмандар, мал азығын құнарландыру цехтары іске қосылды. 2005 жылы Т.Балхашевтың «Жылдар жаңғырығы» атты естелік кітабы жарық көрді. Онда автор Орда, Чапаев аудандарында болып өткен тарихи оқиғалар, Ұлы Отан соғысы кезіндегі шайқастар туралы баяндап, құнды мәліметтер қалдырды. Т.Балхашевтің Ұлы Отан соғысындағы ерліктері мен бейбіт өмірдегі ерен еңбектері жоғары бағаланып «І және ІІ дәрежелі Отан соғысы», «Қызыл жұлдыз», Даңқ, екі мәрте «Еңбек Қызыл Ту» ордендерімен, өзге де медаль, грамоталармен марапатталды. Ұлы Отан соғысының ардагері Т.Балхашев 2009 жылы дүниеден өтті.