Путь Героя

«ЕРЛІК - ЕЛГЕ МҰРА, ҰРПАҚҚА ҮЛГІ» Қалдыбеков Сәрсенбай Қалдыбекұлы (1924 - 2011 жж) 2025 жыл – адамзат тарихындағы ең ауыр, ең қасиетті Жеңістің 80 жылдығы. Бұл күн – сұрапыл соғыста елі үшін жан аямай шайқасқан, кейін бейбіт өмірде елге адал қызмет еткен ардагерлерді еске алатын ұлы күн. Осы орайда біз Ұлы Отан соғысының ардагері, абзал азамат, ардақты әкеміз, жанашыр атамыз Қалдыбеков Сәрсенбайды (1924–2011) зор сағынышпен, үлкен құрметпен еске аламыз. Сәрсенбай Қалдыбеков 1924 жылы Бөртескен – Боти, қазіргі Өзбекстан ССр-і Жызақ облысына қарасты Арнасай ауылында дүниеге келген. 1936 жылы Мақтаарал ауданына қарасты «Өнімкер» колхозына келіп, сол жердегі бастауыш мектепте сауатын ашқан. Бастауыш мектепті бітірген кезде халықаралық шиеленіс күшейіп, артынша Ұлы Отан соғысы басталып, оқуын ары қарай жалғастыруға мүмкіндігі болмай колхоз өміріне араласып, хатшылық қызмет атқарған. 1943 жылы 13 қарашада 19 жасында өз өтініші бойынша Армия қатарына алынады. Қанды майданда жүріп, ерлікпен шайқасты, жауға қарсы кеудесін тосып, жеңісті жақындатуға үлес қосты. Ұлы Отан соғысын жеңіспен Берлинде аяқтап, содан кейін одақтастар армиясының құрамында үш жылдай қызмет атқарып, 1946 жылғы «Потсдам» конференциясында одақтастар жауынгерлерімен күзетшілік қызметті ойдағыдай атқарғаны үшін, И.В. Сталиннің өз қолынан мақтау грамоталарымен марапатталып, аман-есен 1948 жылы қазан айында елге оралды. Соғыстан кейін елге аман оралып, туған жерінің өркендеуіне адал еңбегімен қызмет етті. Елге аман-есен келген соң, бейбіт еңбекке араласып, 1948 жылдан 1984 жылы зейнеткерлікке шыққанға дейін ауданның қаржы саласында, денсаулық сақтау салаларында аянбай абыройлы еңбек етіп, зейнетке шықты. Ұлы Отан соғысына қатысып, «Ерлігі үшін», «І дәрежелі Қызыл жұлдыз», «Жеңіс үшін», «Варшава үшін» деген медаль – ордендермен марапатталған. Оның кеудесіндегі орден-медальдары – тек жеке ерліктің ғана емес, ұлт алдындағы адал борыштың белгісі.. Сәрсенбай Қалдыбекұлы – тек соғыста батыр, бейбіт күнде еңбек майталманы ғана емес, ұрпағына үлгі болған парасатты әке, сүйікті жар, ардақты атаның бірі. Оның өмір жолы – қажыр-қайраттың, төзім мен табандылықтың, Отанға деген шексіз сүйіспеншіліктің нақты көрінісі. Аяулы апамыз Пердегүл Ерназарқызымен шаңырақ көтерген отбасылық өмірде, Аллаға шүкір, 4 ұл, 5 қыз тәрбиелеп, өрісі кеңейіп, 45 немере, 170 шөбере сүйіп, бүгінгі таңда 50 шөпшек тәрбиеленуде. Ұрпағыңызбен мың жасаңыз ата! Бүгінде бейбіт аспан астында өмір сүріп жатқан әрбір ұрпақ оның ерен еңбегін ұмытпауы тиіс. Ерлік – елге мұра, ұрпаққа үлгі. Ардақты Сәрсенбай ата, Рухыңыз пейіште шалқысын, Жаныңыз жәннатта болсын. Ұрпақтарыңыз сізді әрдайым мақтанышпен, жүрек толқынысымен еске алады.