Қазақстанда Ұлы Отан соғысына қатысушылар туралы архивтік мәліметтерді цифрландыру жұмыстары жалғасуда

Жұмыстың негізгі дереккөздері — тарихи есепке алу журналдары мен әскерге шақырылушылардың әліпбилік кітаптары. Бұл құжаттарда әскери қызметке 1938–1945 жылдары шақырылған азаматтар туралы мәліметтер қолмен жазылған.

Қолжазбалардың ерекшеліктері мен архивтік құжаттардың сақталу жағдайына байланысты мәтінді автоматты түрде тану жүйелері қажетті ақпаратты әрдайым дәл анықтай алмайды. Сондықтан жұмыстың едәуір бөлігі қолмен орындалады: мамандар архивтік журналдарды біртіндеп зерделеп, мәліметтерді электрондық кестелерге енгізеді, оларды жүйелеп, порталдың дерекқорына жүктемес бұрын тексереді.

Мұндай тәсіл тарихи материалдарды барынша дәл өңдеуге және қазіргі ақпараттық жүйелерде пайдалану қиын болатын мәліметтерді сақтап қалуға мүмкіндік береді.

Цифрлық дерекқорды толықтыру — Қазақстанның тарихи мұрасын сақтау жолындағы маңызды кезең. Мамандардың бірлескен жұмысының арқасында архивтік мәліметтерді іздеу, зерделеу және ғылыми-зерттеу жұмыстарында пайдалану мүмкіндігі кеңейіп келеді.

«Батырларға тағзым» порталының басты мақсаты — Отан қорғаушылардың есімдерін сақтау, тарихи құжаттар мен өмірбаяндық мәліметтерді бірыңғай ақпараттық кеңістікке біріктіру және Жеңіс ұрпағының ерлігі туралы тарихи жадты келер ұрпаққа жеткізу.